Артистiң тынысы – сахна мен көрермен. Сомдайтын рөлдері мен көрер көрермені көбейген сайын артистің тынысы да кеңейе түседі. Бір байқағанымыз, артистің көзін көрген әріптес аман болса, оның бейнесі күндердің күнінде өзі сүйген сахнасында қайта жаңғырады.
Ғабит Мүсірепов атындағы Балалар мен жасөспірімдер театрында «ҚР еңбек сіңірген артисі, Мемлекеттік сыйлықтың лауреаты – Мәкіл Құланбаев 90 жаста» атты еске алу кеші өтті.
Кеш шымылдығы Мәкіл Иманәліұлымен сахналас болған әріптестері, халық артистері Роза Әшірбекова, Лидия Кәденова, Тамара Қосыбаева және режиссер Есмұхан Обаевтардың естелікке толы бейнеролигімен ашылды. Бұл кеште «Артистің жайын артис айтсын» дегендей, театр актерлары Мәкіл Құланбаев пен әріптестері сахнада жүрген көрікті кезеңді көрермен көз алдына әкелді. Мәкіл Құланбаев, Асқар Тоқпанов, Мұқан Батыгереевтей өр рухты азаматтардың рөлдерін сомдап, театр ұжымы көрерменді бір қуантты. Өнерсүйер қауымның санасында сақталған Мәкіл бейнесі қайта жаңғырғандай болды. Театр актеры Қуаныш Тұрдалин Мәкіл Құланбаевтың образына еніп, артистің әзілін, жүріс-тұрысы мен артисті танитындар ұмытпайтын «Әл-фарабишылдығын» көрерменнің есіне салғандай болды. Кішігірім сахналық көрініске құрылған еске алу кешінде актерлердің сомдауында рөлдер ойналып, эстрада әншілерінің орындауында әуезді әндер шырқалды. Шара соңында Мәкіл Иманәліұлының келіні Зейнеш Құланбаева мен немересі Айжан Құланбаева, талай жылдар әріптес болған Тұңғышбай Жаманқұлов, шәкірті әрі әріптесі Ғазиза Әбдінәбиевалар өзекжарды естеліктерімен бөлісті. 67 жасына қараған шағында дүниеден озған сахна саңлағы бүкіл ғұмырын өнерге арнаған. Өзінің шығармашылық өнер жолында екі жүзден астам рөлдi сомдаған. Сахнадағы алғашқы рөлі Ғабит Мүсіреповтің «Қозы Көрпеш – Баян сұлудағы» Қодардан бастау алып, Мұхтар Әуезовтің «Еңлік – Кебегіндегі» – Есен, «Ақан сері – Ақтоқтыда» – Науан хазірет сияқты үлкен рөлдерді шебер ойнап, «Менің атым Қожа» фильміндегі Қаратай арқылы көрерменге кеңінен танылды.
Роза ӘШІРБЕКОВА,
Қазақстанның халық артисі:
– Мәкіл аға – сахнаға жаралған тұлға. Мәкіл Иманәліұлын қай жанрға салсаңыз да керемет алып шығатын. Тарихты терең меңгерген, жан дүниесі мықты, өте қарапайым жан еді. Ол кездерде гастрольдерге жиі шығатынбыз. Сол сапарларда Мәкіл ағам көл, өзен көрсе, сол жаққа жүгіретін. Бір қызығы, үнемі қармақсыз балық аулайтын қабілеті болды. Мәкіл аға әулетімен өнерпаз, текті болатын.
Өнер – тамшыдан құралатын нәзіктік. Артисті сол үлпілдек нәзіктік биік шыңдарға жетелеуі мүмкін, кейде құздардан құлдыратуы да ғажап емес. Себебі, «Нәзіктікке сотқарлау сыншының сойқан балтасы емес, арудың бір тал шашы да ауыр тиюі мүмкін». Ғұмырын сахнада өткізген Иманәлінің ұлы Мәкіл бұл ойымызбен сөзсіз келісер еді…
Гүлім САДЫРБЕК
Ақпарат көзі: https://aikyn.kz/2017/01/26/1852.html