Жақында ғана Ғабит Мүсірепов атындағы Қазақ мемлекеттік балалар мен жасөспірімдер театрының басшысы атанған Азамат Сатыбалды 2019 жылдағы алғашқы қойылымды көрермен назарына ұсынды. Ол биылғы тұсаукесерге “хайп” тақырыбын арқау еткен деп хабарлайды “Ревю” бағдарламасына сілтеме жасаған NUR.KZ.
Азамат басқаратын театрдың жаңа жылдағы алғашқы қойылымы – “Ұмытыңдар оны…” деп аталады.
Шығармашылық ұжым Григорий Гориннің “Забыть Герострата” пьесасының қазақшаға аударылған нұсқасын сахналаған.
“Шындығы керек, бұл “хайп” деген баяғыда болған. Қазір де бар, кейін де болады. Бірақ әр уақытқа байланысты сол терминнің атауы өзгеріп тұрады.
Қазір “хайп” десе, бұрын басқа деген шығар. Сондықтан кезіндегі “хайптың” қандай болғанын, кезінде өмір сүргенін біз қазір сахнадан көрсететін боламыз”, – деді Азамат Сатыбалды.
Бұл спектакльде атақ үшін 120 жыл бойы салынған ғибадатхананы бір-ақ күнде өртеген саудагердің әрекеттері көрсетіледі. Ақырында оған Құдайдың қаһары, сот пен өлім де еш әсер етпеген екен.
Айта кетерлігі, қойылымдағы басты кейіпкерді “Алашұлы” тобының әншісі әрі актер – Мақсат Рахмет сомдайды.
“Біз кішкене авторға қарсы шығып, Геростратты тірі қалдырдық та, халықтың ішіне кіргізіп жібердік. Яғни, біздің арамызда Геростраттар толып жүр деген сөз”, -деді Мақсат Рахмет.
Источник: nur.kz