Ғабит Мүсірепов атындағы Қазақ Мемлекеттік Академиялық балалар мен жасөспірімдер театры
БАҚ жаңалықтары Мекеме жаңалықтары

Өмірдің өзінен алынған қойылым

Балнұр АХМЕТ

Ғ.Мүсірепов атындағы Қазақ мемлекеттік академиялық балалар мен жасөспірімдер театры драматург Баянғали Әлімжановтың «Супер жеңгетай Серкеш» комедиясын көрермен назарына ұсынды. Қазіргі замандағы адам баласын толғандырған бірқатар өзекті мәселелерді арқау еткен спектакльдің қоюшы-режиссері – Қазақстанның еңбек сіңірген қайраткері, Тәуелсіз «Тарлан» сыйлығының лауреаты, «Құрмет» орденінің иегері Жанат Хаджиев, қоюшы-суретшісі – ҚР мәдениет қайраткері Серікқан Омаров. Ойлы күлкіге құрылған комедиялық қойылымның басты кейіпкерлерін Елдар Отарбаев, Гүлбаһрам Байбосынова, Сафуан Шаймерденов, ҚР еңбек сіңірген әртісі, «Құрмет» орденінің иегері Сағызбай Қарабалин ойнады. Пьесаның авторы шығарманың астарына үңілген жан терең сыр аңғаратынын айтты.                                               

– Бұл қойылымда бүгінгі заман­дағы халқымыздың қазіргі қалпы мен мінезінің кейбір қырлары көр­сетілген. «Қаптан шыққан қара қыз» деп аталған бұл пьесамды осыдан бірнеше жыл бұрын Қызылорда театры «Еңсұлу-Меңсұлу» деген атаумен сахналаған болатын. Шынын айтсам, бұл шығарма халқым бір рахаттанып күліп, демалсын деген ниеттен туған туынды. Біле білсек, күлкінің астарында терең ой мен өмірдің шындығы жатады. Күлдіре отырып, көрермен көңіліне ой ұялат­қымыз келетіні рас. Қойылымдағы әр образдың, әр оқиғаның астарында өрілген ой бар. Қаламның қуатымен өмірдің шындығын, адамның тағды­рын көр­сете отырып, оқырманды ой­ландыруға ұмтылдым. Бұл қойы­лым­ның 70 жылдық тарихы бар киелі өнер ордасында сахналан­ғанына шын жүректен қуаныш­тымын, – дейді Баянғали Әлім­жанов.

Адамды күлдіріп, жылататын, жы­латып, күлдіретін комедия қиын жанр екендігін атап өткен спекта­кльдің қоюшы-режиссері Жанат Хад­жиев өз сөзінде бұл комедия арқылы көрермен көп нәрсені көңіліне түйетінін тілге тиек етті. Өмірдің өзінен алынған қойылымның басты кейіп­кер­лерінің бейнесін сомдаған театр әртістері өз кейіп­керлерінің та­биғатын ашуға үлкен жауап­кер­шілікпен қарағандарын жеткізді.

– Бұл спектакльде мен Сер­кеш есімді басты кейіпкердің рөлін ойнаймын. Кейіпкердің жандүниесін көрерменге көрсету үшін адамның образын, іс-қи­мылын біраз зерттедім. Уақыт өте келе сахнада ойнаған сайын бұл бейне әлі ашыла түсетініне сенемін. Серкеш – спектакльдің сәнін кіргізетін кейіпкер. Сон­дықтан, қойылым қызықты бол­уы үшін, көрерменнің көңілінен шығу үшін бар өнерімді салуға тырыстым, – деді Елдар Отар­баев.

Қойылымда басты кейіпкер­лер көптеген күтпеген жағдай­ларды бастан өткізеді. Дүние­қоңыздық, мақтаншақтық, мен­меншілдік, қара басының қамын ойлау тәрізді көңілді кірлететін қасиеттерден арылу қажеттігі туралы сыр шертетін қойылым­ның астарынан адамгер­шіліктің асыл қасиеттерін сақтап қалған адам ғана өмір сынағынан сүрінбей өтетіндігі айқын аңға­рылады.

Ақпарат көзі: http://almaty-akshamy.kz/2016/11/22/%D3%A9%D0%BC%D1%96%D1%80%D0%B4%D1%96%D2%A3-%D3%A9%D0%B7%D1%96%D0%BD%D0%B5%D0%BD-%D0%B0%D0%BB%D1%8B%D0%BD%D2%93%D0%B0%D0%BD-%D2%9B%D0%BE%D0%B9%D1%8B%D0%BB%D1%8B%D0%BC/

ОҚИ ОТЫРЫҢЫЗ

Халықаралық театр күні мен Ғ.Мүсіреповтің 115 жылдығына арналған «Алтын сақа» жаңа қойылымдар фестивалі басталды

admin

Құрманғазы оркестрі мен Мүсірепов театры көрерменге концерт-спектакль ұсынды

admin

9 желтоқсанда өткен желтоқсаншылармен кездесу күні есте қаларлықтай дүниелермен толықты. Бәріміз ерекше көңіл-күйді жыр ете айта шығатын, Ғ.Мүсірепов атындағы қазақ мемлекеттік академиялық балалар мен жасөспірімдер театрында “Желтоқсан-86” тәуелсіз күрескерлермен кездесу өтті. Қиын-қыстау заманның кейіпкерлері 1986 жыл 16 желтоқсанды терең күрсініспен еске алды және әрбір оқушының сауалына жауап қатып, пікірін тыңдап ой қорыта білді. Аталмыш шарадағы батыр апа-ағаларымыздың ерлік пен өрлік, қайғы мен қасірет араласқан қаралы да қасіретті күні тыңдап отырған бізді де бей-жай қалдырмады. Сондай-ақ, ерліктің ащы тұстары айтыла түсіп, жыл сайын күрескерлер ақталып, осы бір қазақтың қабырғасын қайыстырып, жүрегін сыздатқан “Желтоқсан оқиғасы” бүгінде қолға алынып, өзіндік мәртебеге ие болғандығы көңіл қуантатынын жасырмаймыз. Сан ғасыр арман еткен Тәуелсіздіктің туы қаһармандардың арқасында келіп жетіп, желбірей түсуде. Өкінішті сәттердің, соның ішінде, сан мыңдаған батырларымыздан қол үзіп қалғанымызбен, олардың қазақ деп ұрандатқан ащы айқайы әрдайым санамызда, жадымызда мәңгілік жаңғырып тұр. Кездесу, Тәуелсіздік үшін жанын пида еткен аға-әпкелеріміздің әңгімелерімен қыза түсті. Өзіндік ойымен қарсы алдымызда, Республикалық “Желтоқсан-86” Тәуелсіздік қырандары Халық қаһармандары қозғалысы төрайымы – Жүніс Гүлбаһрам Есмұратқызы, Тәуелсіздік күрескері – Сейтімбет Үсіпхан Әбдікерімұлы және Гүлнәр Сейтімбеттей аға-апаларымыз бөлісті! Сөз соңында, тәуелсіздік жолында қаза тапқан батыр қызымыз Ләззат Асанованың анасы да көзіне жас ала отырып, әңгімесін, тілек, алғысын жеткізе білді. Жас балғындарымызда есті әңгімеге елітіп, тіпті өлең шумақтарын жарыса оқып, патриот ұрпақтың өсіп келе жатқандығын дәлелдей түсті. Сонымен қатар, тәуелсіз күрескерлерге баршамыз өре түргеліп, Желтоқсанның жаңғырығына, ызғарлы желіне төтеп бергендігіне жарыса алғысымызды жаудырдық. Кеш соңы театр ұйымдастырған “Желтоқсан желі” атты қойылыммен жалғасын тапты.#Тәуелсіздіккүрескерлері #желтоқсанжелі#алғысымызшексіз

admin