Ғ.Мүсірепов атындағы Қазақ мемлекеттік академиялық балалар мен жасөспірімдер театрында «Алтын сақа» атты жаңа қойылымдар фестивалінің ашылуы өтті. Халықаралық театр күніне орай ұйымдастырылып отырған шарада бір жылда көрермен назарына ұсынылған жаңа спектакльдер бақ сынап, «жүзден жүйрік, мыңнан тұлпар» шығатын үздіктер анықталмақ.
Шараны ашқан театр директоры Сәбит Әбдіқалықов мұндай фестиваль жастар арасында театрды дәріптеуге қажет екенін баса айтты. «2016 жылы фестиваль тек қана балаларға арналса, қазір ауқымы кеңейіп, барлық қойылымдарды қамтуда. Өткен жылы театрымыз өте белсенді жұмыс істеді. Фестивальдің негізгі мақсаты – соңғы бір жылдағы артистердің еңбегін бағалау, жаңа дүниелерді халыққа таныту, көрерменнің сыни пікірлерін ескеру. Негізгі көрермендеріміз – балалар болғандықтан, «Менің сүйікті кейіпкерім» атты Алматы қаласы және облысы мектептері бастауыш сынып оқушылары арасында сурет салудан байқау өткіздік. Байқаудың шарты бойынша сүйікті спектакльдің кейіпкерін салды» дей келе жеңімпаздар фестивальдің жабылуында марапатталатынын атап өтті.
Театрдың көркемдік жетекшісі Еркін Жуасбек театр мен көрермен арасындағы байланыс, балаларға қойылымдарды сәтті ұсынудың маңызына айрықша мән берді. «Ертегіні қою бөлек, спектакльді қою бір басқа. Болашақта қандай бағытта дамып келе жатқанымызды іздеп, жауап табу үшін осындай фестивальдер жасалады. Жас ерекшеліктеріне бөліп, балаларға арналған қойылымдар қоямыз. Сол дүниелер бүлдіршіндерге қаншалықты түсінікті әрі балаға ой сала білгенін анықтау – үлкен шаруа. Қазіргі таңда спектакльдердің өзін үлкендерге не балаларға бөлудің өзі сұрау үстінде тұрған жағдай. Себебі, бүлдіршіндеріміз интернет арқылы ересектер түсіне бермейтін спектакльдерді, фильмдер мен бағдарламаларды көреді. Сондықтан балаларға басқа интеллектуалды спектальдер қою керек шығар. Міне, өзімізге қойып отырған сұрақтарға жауапты осындай фестивальдер аясында табуға тырысамыз. Кішкентай көрермендер арасындағы сурет байқауын ұйымдастырдық балалардың спектакльден алған әсерін, сезімін білу мақсатында болды» деген ол бала көрерменге басқаша жеткізу тәсілі, жаңаша актерлік мектепті іздеу де фестиваль аясында қамтылатынын айтты. Қазақстанның халық артисі Роза Әшірбекова фестиваль актерлер мен режиссерлердің есеп беруі іспеттес дүние болғандықтан, осымен үшінші жыл дәстүрлі өткізіліп келе жатқанын тілге тиек етті.
Үздіктерді анықтайтын қазылар алқасының құрамына Қазақстанның еңбек сіңірген қайраткері, профессор Дариға Тұранқұлова, Қазақстанның еңбек сіңірген қайраткері Әлия Бөпежанова, өнертану докторы, профессор Бақыт Нұрпейіс кірді. 30 наурызға дейін жалғасатын фестиваль репертуарында «Сең», «Аққулар ұйықтағанда», «Жусан иісі», «Шыңырау», «Жаңа жылдық бәйшешек», «Базарың тарқамасын» қойылымдары бар.
Ақбота ИСЛӘМБЕК
Ақпарат көзі: https://aikyn.kz/2018/03/28/47285.html